Myfyrwyr Howells yn cefnogi Ymgyrch Oxfam Cymru - Erfyn ar y Sêr
9 Gorffenaf 2008
Mae myfyrwyr Ysgol Howells, Llandaf, wedi ymuno ag ymgyrch Oxfam Cymru i annog arweinwyr y byd i roi blaenoriaeth i weithredu ar newid hinsawdd, cymorth a gofal iechyd yn Uwchgynhadledd yr G8 yn Siapan.
Bydd pedwar disgybl chweched dosbarth Ysgol Howells, Llandaf yn Siapan yr wythnos hon yn mynychu'r J8 - y gynhadledd iau fyd-eang sy'n cael ei chynnal ar yr un pryd ag Uwchgynhadledd yr G8. Byddant yn cludo negeseuon Oxfam Cymru gyda hwy wrth gynrychioli'r DG yn y cyfarfod.
Mae ymgyrch Dymuniadau Oxfam Cymru yn galw am weithredu parhaus ar gymorth tramor, gofal iechyd byd eang a thaclo newid hinsawdd. Mae'r uwchgynhadledd yn cychwyn ar yr un diwrnod a'r ŵyl Siapaneaidd Tanabata. Ar y diwrnod hwn, mae pobl yn clymu dymuniadau ysgrifenedig ar goed bambŵ, ac mae Oxfam Cymru yn gofyn i bobl ledled Cymru anfon dymuniad Tanabata at arweinwyr y byd.
Cyn mynd i'r dwyrain pell, bu'r ymgyrchwyr ifanc yn casglu cefnogaeth gartref, gan sicrhau bod yr holl ysgol wedi ymrwymo i'r ymgyrch.
Meddai Jasper Warner: "Mae cydweithio gydag Oxfam Cymru yn wych - rydym yn cytuno'n llwyr gyda'r Ymgyrch Gweithredu Nawr - sicrhau bod arweinwyr y byd yn cyflawni yn union yr hyn a addawyd tair blynedd yn ôl...Mae'n bryd iddynt gadw at eu gair.''
Ychwanegodd Hannah Cockley, "Rydym am i wyth arweinydd mwyaf pwerus y byd glywed neges glir o Gymru - bod rhaid ymrwymo at gytundeb fyd eang gref i ostwng gollyngiadau carbon yn ddrastig. Rhaid iddynt hefyd ddarparu cyllid i gynorthwyo gwledydd tlawd wrth addasu i newid hinsawdd."
Meddai Rose Stuart, "Ni yw'r dyfodol, ac os na fydd arweinwyr y byd heddiw yn gweithredu yn unol â'u haddewidion ar unwaith, ni fydd yn talu'r pris ymhen ugain mlynedd."
Meddai Harry Brooks, "Dylai mwy o bobl ifanc yng Nghymru ystyried pa fath o fyd y byddwn yn byw ynddi pan fyddwn yn hŷn, a gweithredu i sicrhau y bydd yn blaned sy'n unol â'n dymuniad."
Meddai Steve Brooks, Pennaeth dros dro Oxfam Cymru: "Mae'n wych bod pobl ifanc Caerdydd yn cefnogi ein hymgyrch Dymuniadau - mae angen i wledydd cyfoethocaf y byd weithredu ar unwaith ar gymorth, iechyd a newid hinsawdd, ac nid gwneud addewidion ar gyfer dyfodol pell."
