O blaid y rhyfel

Yn erbyn y rhyfel

Roedd yn rhaid i UDA a’r DG fynd i ryfel er mwyn cael gwared â Saddam Hussein, sydd yn ‘unben drwg’.

Pam yn awr? Buom yn cefnogi’r ‘unben drwg’ hwn gydag arfau yn ystod y rhyfel rhwng Iran ac Irac o 1980 tan 1988, a phan ddefnyddiodd Irac arfau cemegol (Americanaidd) yn erbyn y Cwrdiaid ym 1988, fe gaeodd y byd ei lygaid ar y peth.

Yr oedd yn arteithio ac yn dienyddio unrhyw un a fyddai’n ei wrthwynebu, ac roedd yn gweithredu cyfundrefn a oedd yn seiliedig ar ofn.

Oedd, ond nid ei lywodraeth ef oedd yr unig un yn y byd a oedd yn gwneud hyn — felly a yw UDA yn awr am ymosod ar unrhyw wlad y mae’n ei chyhuddo?

Ar y llywodraeth yn llwyr y mae’r bai am ddioddefaint pobl Irac — pe bai’r llywodraeth wedi cydymffurfio â phenderfyniadau’r Cenhedloedd Unedig, buasai’r sancsiynau wedi cael eu dileu.

Cafodd y sancsiynau eu gorfodi gan y Cenhedloedd Unedig. Mae UDA wedi dweud o’r dechrau — er nad bob amser yn gyhoeddus — y byddai sancsiynau’n aros mewn grym nes i Saddam ymadael.

Yr oedd angen sancsiynau er mwyn rhwystro’r llywodraeth rhag dod yn fwy grymus.

Mewn gwirionedd, cynnal y llywodraeth wnaeth y sancsiynau, gan nad oedd gan bobl newynog unrhyw ddewis ond cefnogi’r rhai a oedd yn eu bwydo.

Mae gan Irac arfau dinistr torfol — rhai cemegol, biolegol a niwclear.

Ni chafodd unrhyw arfau o’r fath eu defnyddio yn y rhyfel, ac ni ddaethpwyd o hyd i rai. Mae gan naw o wledydd eraill arfau niwclear.

Mae Saddam Hussein wedi rhoi nawdd i derfysgwyr, ac mae ganddo gysylltiadau ag al-Qaida. Gallai werthu neu roi arfau iddynt i’w defnyddio yn ein herbyn ni.

Nid oes unrhyw gysylltiadau gydag al-Qaida wedi eu profi. Mae Osama bin Laden wedi galw, hyd yn oed, am jihad yn erbyn Saddam oherwydd ei fod yn ‘anffyddiwr’.

Yr oedd pobl Irac eisiau cael gwared â Saddam Hussein a’i lywodraeth.

Mae hyn yn wir — ond nid waeth beth oedd y gost. Efallai nad yw’r Iraciaid eisiau Saddam, ond nid ydynt yn dymuno cael eu llywodraethu gan America ychwaith.

Y mae Irac wedi torri saith o benderfyniadau’r Cenhedloedd Unedig.

Ond mae gwledydd eraill wedi gwneud hynny hefyd, megis Israel, sydd wedi wfftio llawer mwy o benderfyniadau heb i neb wneud dim ynghylch y peth.

Ni ellir caniatáu i Irac anwybyddu’r Cenhedloedd Unedig.

Onid dyna’n union y mae UDA a’r DG yn ei wneud yn awr trwy fynd i ryfel heb gefnogaeth y Cenhedloedd Unedig?